يا راجل احنا كبرنا خلاص عيب الي بتطلبه ده

السلام عليكم و رحمة الله
انهارده افتكرت حكايه واحده كنت اعرفها
الله يرحمها و يجعل مثواها الجنه
قولوا امين 

الست دى كانت محترمه اوى مع جوزها
يعنى بتلبس حشمه و نص كم و طويل فى البيت
حتى فى عز الحر
شعرها دايما مربوط بمنديل
كانت دايما بترفض ان جوزها يقربلها
و بتنام جنب بنتها
مره تتحجج بانها تعبانه و مرات بترفض رفضاً باتاً
لمجرد انهم كبروا و بقى عندهم عيال
وكل ما جوزها يطلبها
تقوله( عيب يا راجل احنا كبرنا خلاص )


المهم ..الست دى ماتت و جوزها غضبان عليها
و بنتها كبرت و اتجوزت و بقت نسخه منها
مع ان بنتها و هى صغيره كانت بتستغرب من افعال امها
لكن غصب عنها اتربت على كده
اتربت على ان امها حشمه و محترمه
دلوقتى البنت دى علاقتها بجوزها زى علاقتها باخوها تمام

متستغربوش
فى بنات كتير زيها كده
اتربوا تربيه غلط من امهاتهم و من غير ما الام تقصد و تقول اعملى كده لما تتجوزى
هى بتطلع تلاقى امها بتعمل كده يبقى هى كمان هتعمل كده و ابو كده
للاسف الشديد ان كتير اوى من بناتنا ميعرفوش يعنى ايه زواج
بتبقى عاوزة تتجوز و خلاص
فاكره ان الجواز فرح و دبله و كلمه حب و بيت تفرشه على ذوقها و خلاص
امها ما قالتلهاش يعنى زوج
امها ربتها على ان الجواز يعنى تخلفى منه على قد ما ربنا يقدرك
و تربى عيالك و تنظفى بيتك و تعمليله اكله حلوه تسد بقه و خلاص
متعلمتش ازاى ترضى زوجها اللى هو ابو ولادها
متعلمتش ازاى تمتعه و تستمتع معاه بحياتهم الخاصه
متعلمتش انه السبب فى وجود ولادها
اتعلمت بس انه يتركن على جنب بمجرد ما ربنا يرزقها بأول طفل
و لما تشتاق تخاوى ابنها تبقى تفكر فيه مره تانيه
اتعلمت ان جوزها ده بنك متنقل
مفيش كلمه منها غير هات علشان عاوزة اشترى ...
طيب الراجل اللى جابلك بيت و فرشهولك من كلهو كان سبب فى انك بقيتى ام ميستحقش منك انك تلبسيله و تدلعيه و تقوليله كلمه حلوه
حتى لو تعبانه ومالكيش نفس تقربى منه
كفايه ابتسامه حلوه و عشوه حلوه و تصبح على خير يا حبيبى انا انهارده تعبانه ..سامحنى
والله العظيم و عن تجربه مافيش احسن من الكلمه الحلوه من الزوجه لزوجها
مفعولها زى السحر
زوجك حلالك و متعتك و رضى ربنا عليكى من رضاه
لازم تخليه هو نمره واحد فى حياتك
مش نمره اتنين بعد ولادك
اتعلمىازاى تمتعيه بكل الطرق
و قبل ماتتجوزى و بعد ما تتجوزى اقرى و اتثقفى و اسألى
بس اسألى اهل العلم مش اهل الخبره بس
حتى لو سألتى واحده متجوزه و عندها خبره ..اسأليها فى الامور اللى انتى شايفاهاناجحه فيها
مش تروحى تسألى واحده هتطلق من جوزها و لا بينهم مصانع الحداد

انا حكيت لكم الحكايه دى علشان كل بنت مقبله على الزواج تسأل و تتعلم كل الامور اللى ترضى زوجها مادامت حلال

ربنا يهدى كل بنات حوا

قولوا اميييييييييييين